Réamhrá
Tá an Chomhairle Mhúinteoireachta freagrach as gairm na múinteoireachta in Éirinn a rialú. Is é an ról atá aici ná an pobal a chosaint trí chaighdeáin ghairmiúla sa mhúinteoireacht a chur chun cinn agus a rialú.
Cláraíonn an Chomhairle Mhúinteoireachta múinteoirí nua, agus déanann sí clárú múinteoirí reatha a athnuachan, a fhad is go gcomhlíonann siad ceanglais áirithe atá leagtha amach san Acht um Chomhairle Mhúinteoireachta 2001 (arna leasaithe) (ar a dtugaimid an tAcht) agus rialacháin arna ndéanamh ag an gComhairle Mhúinteoireachta faoin Acht.
Tá sé molta ag an gComhairle Mhúinteoireachta rialacháin nua a dhéanamh. Tiocfaidh na rialacháin seo (na “rialacháin chlárúcháin atá molta”) in ionad na rialachán clárúcháin atá ann cheana féin, arb iad Rialacháin na Comhairle Múinteoireachta (Clárú) 2016 (I.R. Uimh. 444 de 2016), arna leasú.
Tá athbhreithniú tréimhsiúil déanta ag an gComhairle Mhúinteoireachta ar na rialacháin chlárúcháin atá ann faoi láthair agus tá roinnt athruithe molta de réir chuspóirí na Comhairle Múinteoireachta maidir le caighdeáin an teagaisc a chothabháil agus gairm na múinteoireachta a rialú.
Fanfaidh go leor de na rialacháin chlárúcháin atá ann anois faoi na rialacháin chlárúcháin reatha, mar an gcéanna. Mar sin féin, táimid ag moladh roinnt leasuithe a dhéanamh i réimsí lena n-áirítear an méid seo a leanas:
- Chun clárú leis an gComhairle Mhúinteoireachta, ní mór d’iarratasóir iarratas a chur isteach do chlárú leis an gComhairle Mhúinteoireachta. Tá doiciméid áirithe nach mór d’iarratasóir a chur isteach mar chuid dá n-iarratas ar chlárú. Glacann na rialacháin chlárúcháin atá molta ceanglais nua isteach agus leasaíonn siad ceanglais reatha maidir le faisnéis agus doiciméadú nach mór d’iarratasóir a chur isteach.
- Baineann seo freisin le múinteoirí a dhéanann iarratas ar athnuachan cláraithe. Glacann na rialacháin chlárúcháin atá molta ceanglais nua isteach maidir leis an doiciméadú agus, faisnéis nach mór d’iarratasóir a chur isteach mar chuid dá n-iarratas ar athnuachan cláraithe.
- Chun a bheith incháilithe do chlárú leis an gComhairle Mhúinteoireachta, ní mór d’iarratasóirí ceanglais cháilíochta a shásamh. Tá na ceanglais cháilíochta reatha le haghaidh clárúcháin leagtha amach sna rialacháin chlárúcháin atá ann cheana. Tá an chuid is mó de na ceanglais cháilíochta mar an gcéanna, ach tá roinnt leasuithe ann.
- Is féidir le hiarratasóir iarratas a dhéanamh ar chlárú leis an gComhairle Mhúinteoireachta trí “bhealaí” éagsúla. Mar shampla, más mian le hiarratasóir múineadh mar mhúinteoir bunscoile, déanfaidh siad iarratas ar chlárú trí Bhealach 1 Bunscoil. Tá bealaí éagsúla inar féidir le hiarratasóir iarratas a dhéanamh ar chlárú faoi na bealaí éagsúla. Fanann na roghanna atá ar fáil faoi na bealaí éagsúla mar an gcéanna den chuid is mó. Mar sin féin, tá roinnt leasuithe beaga ann faoi na rialacháin chlárúcháin atá molta.
- Nuair a chláraíonn múinteoir leis an gComhairle Mhúinteoireachta, tugtar teastas clárúcháin dóibh. Tá faisnéis áirithe ar an teastas. Faoi na rialacháin chlárúcháin atá molta, tá leasuithe áirithe á ndéanamh ar an bhfaisnéis a bheidh ar an teastas clárúcháin.
- Tá an Chomhairle Mhúinteoireachta freagrach as clár múinteoirí a choinneáil. Má tá an t-iarratasóir cláraithe leis an gComhairle Mhúinteoireachta, cuirfear eolas áirithe ar an gClár. Fanfaidh an fhaisnéis atá ar an gClár mar na gcéanna den chuid is mó faoi na rialacháin chlárúcháin atá molta. Mar sin féin, tá roinnt leasuithe molta.
Faigh cóip de na rialacháin chlárúcháin atá molta anseo (Béarla).
Comhréireacht
Éilíonn Treoir (AE) 2018/958 (a dtabharfaimid an Treoir Chomhréireachta uirthi) go ndéanfadh Ballstáit an AE measúnú comhréireachta sula dtabharfar isteach foráil rialála ghairmiúil. Is éard is foráil rialála ghairmiúil ann ná foráil nua, nó leasú ar fhoráil reachtaíochta, rialála nó riaracháin atá ann cheana a chuireann srian le rochtain ar ghairm rialáilte nó le saothrú na gairme sin. Is gairm rialaithe in Éirinn í an mhúinteoireacht.
Rinneadh an Treoir Chomhréireachta a thrasuíomh i ndlí na hÉireann ag Rialacháin an Aontais Eorpaigh (Measúnú Comhréireachta Gairmeacha Rialáilte) 2022 (I.R Uimh. 413 de 2022) (ar a dtabharfaimid na Rialacháin Chomhréireachta).
Tá gá le measúnú comhréireachta ar na rialacháin chlárúcháin atá molta. Mar chuid den mheasúnú comhréireachta seo, tá suirbhé á eisiúint ag an gComhairle Mhúinteoireachta ag lorg tuairimí na bpáirtithe leasmhara. Cabhróidh na freagraí ar cheisteanna an tsuirbhé leis an measúnú comhréireachta seo.
Conas a bheith rannpháirteach sa chomhairliúchán
Léigh le do thoil an achoimre éasca le léamh thíos chun forbhreathnú a fháil ar na rialacháin chlárúcháin atá molta.
Más mian leat dul i ngleic le measúnú comhréireachta na Comhairle Múinteoireachta ar na rialacháin chlárúcháin atá molta, comhlánaigh ceisteanna an tsuirbhé ag Cuid 1 go 4 den suirbhé gearr ar líne anseo. Tagraíonn ceisteanna an tsuirbhé do go leor de na ceanglais bhreise nó nua atá leagtha amach sna rialacháin chlárúcháin atá molta.
Chomh maith le tuairimí na bpáirtithe leasmhara a lorg maidir le comhréireacht na rialachán clárúcháin atá molta, táimid ag lorg tuairimí agus barúlacha ginearálta ó pháirtithe leasmhara maidir leis na rialacháin chlárúcháin atá molta. Más mian leat aiseolas ginearálta amháin a thabhairt, comhlánaigh Cuid 1 agus Cuid 5 ag deireadh an tsuirbhé ar líne anseo. Léigh ceisteanna an tsuirbhé ag Cuid 2 go 4 le do thoil mar go bhféadfaidís cabhrú leat na hathruithe atá á ndéanamh a aithint, ach ná freagair iad mura mian leat páirt a ghlacadh i measúnú comhréireachta na Comhairle Múinteoireachta. Chun cuidiú leis an gComhairle Mhúinteoireachta dul i ngleic go héifeachtach le tuairimí na bpáirtithe leasmhara, d’iarrfaimis go mbeadh aighneachtaí faoi Chuid 5 teoranta do 1,000 focal. Ullmhóidh an Chomhairle Mhúinteoireachta tuarascáil ar an gcomhairliúchán poiblí.
Formáid an tSuirbhé
- Fút Féin
Cuid 1 (Ceisteanna 1 – 5)
- Measúnú Comhréireachta
Cuid 2 go dtí 4 (Ceisteanna 6 – 19)
- Aiseolas ginearálta
Cuid 5 (Ceist 20)
Déileálfar go docht le haon fhaisnéis phearsanta a chuirtear faoi bhráid na Comhairle Múinteoireachta i gcomhréir leis an Rialachán Ginearálta um Chosaint Sonraí 2016/679 agus an tAcht um Chosaint Sonraí 2018. Tabhair faoi deara le do thoil gur féidir faisnéis a fhaightear a lorg faoin Acht um Shaoráil Faisnéise 2014 agus féadfar í a scaoileadh mar fhreagra ar iarratas SF. Déanfar aon fhaisnéis phearsanta a chuimsítear sa suirbhé seo a bhaint amach sula scaoilfear é.
Chun Ráiteas Príobháideachta na Comhairle Mhúinteoireachta a léamh cliceáil anseo.
Achoimhre ar na Rialacháin atá éasca le léamh
Rialacháin chlárúcháin atá molta
Suirbhé Comhairliúcháin
Tá an comhairliúchán oscailte anois le haghaidh aighneachtaí. Is é 27 Meán Fómhair 2024 an dáta deiridh.
Chun páirt a ghlacadh sa chomhairliúchán, cliceáil le do thoil ar an nasc suirbhé thíos.
Tuilleadh ceisteanna
Má tá tuilleadh ceisteanna agat, seol ríomhphost chuig regulationsconsultation@teachingcouncil.ie