1. Buntreoir ar an Sparánacht um Chomharfhoghlaim Ghairmiúil
Tá dhá phríomhchuspóir ag an sparánacht seo:
- Pobail Ghairmiúla Chomhoibríocha a Thógáil: Tá an sparánacht deartha chun tacú le cruthú agus inbhuanaitheacht na bpobal foghlama gairmiúla.
- Gairm na Múinteoireachta a Chur Chun Cinn: Beidh ar gach duine a fhaigheann sparánacht sócmhainní digiteacha a chruthú lena dtaispeántar a ngníomhaíochtaí foghlama gairmiúla a úsáidfear chun gairm na múinteoireachta a chur chun cinn ar bhealach níos leithne.
2. Gníomhaíochtaí Incháilithe
Féadfaidh scoileanna an sparánacht sin a úsáid chun gníomhaíochtaí foghlama gairmiúla áitiúla a eagrú agus a óstáil ar ghníomhaíochtaí iad lena dtugtar aghaidh ar riachtanais agus leasanna a bpobal scoile. Ní mór do na gníomhaíochtaí a ailíniú le ceann amháin nó níos mó de na réimsí seo a leanas:
Pobail Foghlama Gairmiúla a Chruthú: Comhoibriú le scoileanna eile sa cheantar áitiúil chun pobail foghlama gairmiúla a chruthú i dtaca le leasanna oideachais comhroinnte.
Ceardlanna/Imeachtaí a Óstáil: Múinteoirí ó scoileanna éagsúla a thabhairt le chéile chun dea-chleachtais a roinnt agus chun foghlaim óna chéile (e.g. lá um fhoghlaim chomhroinnte).
Cuireadh a thabhairt do chainteoirí: A shocrú go dtabharfaidh cainteoir seisiún forbartha nó faisnéise do mhúinteoirí i do scoil nó i gcnuasach scoileanna.
Imeachtaí/Cláir Chomhpháirteacha um Fhorbairt Ghairmiúil: Comhoibriú le scoileanna eile chun imeacht nó clár forbartha gairmiúla a eagrú i ndáil le hábhair cosúil le dearadh uilíoch don fhoghlaim, teicneolaíocht san oideachas, nó cleachtas athchóiritheach.
Staidéar Ceachta a Eagrú: Dul i gcomhpháirtíocht le scoileanna eile chun staidéar ceachta a dhéanamh ina ndéanann múinteoirí foghlaim agus múinteoireacht a phleanáil chomh maith le breathnú agus anailís a dhéanamh orthu i ‘gceachtanna taighde’ i gcomhpháirt lena chéile.
3. Téamaí Iarratais
Ní mór d’iarratais a bheith bunaithe ar cheann amháin ar a laghad de na téamaí seo a leanas:
Cleachtas Ionchuimsitheach
Múineadh na Gaeilge
Ceannaireacht agus Caidreamh Gairmiúil
Folláine
Ailíniú le beartas ainmnithe de chuid na Comhairle Múinteoireachta nó le Beartas nó Straitéis de chuid na Roinne Oideachais e.g. Cosán, Droichead, SSE (Ag breathnú ar an Scoil Againne).
4. Sonraí Maoinithe
Leis an sparánacht, cuirtear trí bhanda maoinithe ar fáil, ag brath ar líon na scoileanna atá páirteach sa chomhoibriú, mar atá leagtha amach thíos:
- Banda 1: €2,000 – Gníomhaíochtaí foghlama gairmiúla a bhfuil dhá scoil páirteach iontu
- Banda 2: €3,000 – Gníomhaíochtaí foghlama gairmiúla Trasearnála a bhfuil dhá scoil nó níos mó páirteach iontu,
- Banda 3: €5,000 – Gníomhaíochtaí foghlama gairmiúla Trasearnála a bhfuil trí scoil nó níos mó páirteach iontu (nó dhá scoil ar a laghad le lárionad oideachais)
Sainmhínítear trasearnáil mar mheascán de shuíomhanna bunoideachais, iar-bhunscoile nó breisoideachais.
Íocfar an sparánacht iomlán leis an scoil cheannais sa chomhar a bhainisteoidh na cistí i measc na scoileanna rannpháirteacha de réir mar is cuí.
Ní fhéadfaidh scoileanna a bheith páirteach nó ainmnithe ach in iarratas amháin ar sparánacht.
Má ainmnítear scoil ar níos mó ná iarratas amháin, ní bhreithneofar ach an chéad iarratas a gheofar.
5. Critéir incháilitheachta
Le bheith incháilithe don sparánacht, ní mór d’iarratais fianaise a chur isteach le haghaidh na gcritéar seo a leanas ar fad:
Comhoibriú: Ní mór do hiarratais fianaise a léiriú ar chomhoibriú le scoil aitheanta amháin eile ar a laghad, nó Coláiste Bhreisoideachas, le huimhir rolla.
Spreagtar comhoibriú freisin le d’ionad tacaíochta oideachais áitiúil nó d’institiúid ardoideachais áitiúil, nó ionad oideachais, mar shampla, suíomh Ógtheagmháil.
- Iarratasóir: Ní mór don iarratasóir a bheith ina mhúinteoir cláraithe ag cur iarratas isteach thar ceann na scoile ceannais. Mura bhfuil tú ag obair i scoil (e.g. mar gheall ar iasacht, dul ar scor etc.) ní mór duit dul i gcomhpháirtíocht le scoil cheannais chun páirt a ghlacadh sa scéim sparánachta.
- An Scoil Ceannais: Is í an scoil ceannais ná scoil aitheanta don Roinn Oideachais nó Coláiste Bhreisoideachas, le huimhir rolla.
Sonraí na scoile ceannais agus na scoile comhoibríche/scoileanna comhoibríocha: Chun an sparánacht a riar, beidh sonraí na scoile ceannais agus gach scoile comhoibríche ag teastáil uainn.
Buiséad agus Amlíne: Miondealú soiléir, réalaíoch ar an mbuiséad agus amlíne maidir leis na cistí a úsáid roimh mhí Iúil 2025.
Toiliú ó scoileanna comhoibríocha: Ní mór toiliú don iarratas a lorg ón bPríomhoide, ón Leas-Phríomhoide nó a chomhionann i ngach scoil chomhoibríoch sula gcuirtear an t-iarratas isteach. Tabhair faoi deara, le do thoil, go ndéanfaidh foireann na Comhairle Múinteoireachta seiceáil inmheánach deiridh chun feasacht agus tacaíocht ceannaireachta scoile agus/nó scoileanna comhoibríocha a dhearbhú sula mbronnfar an sparánacht.
Cur síos ar ghníomhaíochtaí foghlama gairmiúla: Cur síos mionsonraithe ar na gníomhaíochtaí atá beartaithe a ailíníonn leis na gníomhaíochtaí agus na téamaí incháilithe a liostaítear sna treoirlínte.
Tionchar: Aidhmeanna agus cuspóirí soiléire maidir le tionchar na ngníomhaíochtaí molta ar fhoghlaim ghairmiúil na foirne agus na scoileanna atá i gceist.
Sócmhainn dhigiteach: Comhaontú chun sócmhainn dhigiteach a chur isteach mar atá leagtha amach i d’iarratas.
6. Riachtanas sócmhainní digiteacha
Chun an mhúinteoireacht mar ghairm a chur chun cinn, ní mór do gach faighteoir sparánachta sócmhainn dhigiteach a chruthú a thaispeánfaidh a ngníomhaíocht nó toradh a ngníomhaíochta. Féadfaidh na sócmhainní digiteacha sin a bheith i bhfoirm aon chinn díobh seo a leanas:
- roinnt grianghraf a thaispeánann na gníomhaíochtaí foghlama gairmiúla i mbun gnímh,
- póstaer,
- déantán digiteach (e.g., beart T-REX nó Padlet),
- machnamh físe (e.g., machnamh fuaime nó físe ar conas a bhain an scoil leas as an sparánacht).
Ní mór na sócmhainní digiteacha sin a roinnt linn roimh mhí Iúil 2025.
Déanfar iad a thiomsú, a fhorbairt agus a úsáid chun gairm na múinteoireachta a chur chun cinn i measc múinteoirí agus an phobail i gcoitinne.
Féadfar na sócmhainní digiteacha a chur ar ár suíomh gréasáin agus ar ár gcainéal meán sóisialta chun comhoibriú gairmiúil a chur chun cinn agus chun gairm na múinteoireachta a thaispeáint ar bhonn níos leithne.
Le cead dearfa na scoile, shocródh an Chomhairle Mhúinteoireachta go dtabhfadh grianghrafadóir cuairt ar scoileanna rathúla áirithe chun sócmhainní digiteacha breise a chruthú.
Níor cheart ainmneacha na ndaoine a glacadh sa tsócmhainn dhigiteach a chur isteach. Níor cheart aon íomhánna de mhionaoisigh nó de dhaoine fásta leochaileacha a chur isteach.
Tá sé de fhreagracht ar gach scoil a chinntiú go gcuirtear gach duine aonair ar an eolas faoi úsáid an phíosa scannánaíochta ionas gur féidir leo cinneadh a dhéanamh gan páirt a ghlacadh más mian leo.
7. Oibleagáidí breise
Chomh maith le sócmhainn dhigiteach, ní mór d’fhaighteoirí sparánachtaí na nithe seo a leanas a chur isteach roimh mhí Iúil 2025:
- machnamh gearr scríofa ar do thaithí agus ar thionchar na ngníomhaíochtaí foghlama gairmiúla,
- suirbhé aiseolais a eiseofar chuig gach faighteoir sparánachtaí rathúla.
- forbhreathnú buiséid ina gcuirtear síos ar an gcaoi ar caitheadh an sparánacht.
8. Rúibric Scórála
| Critéir | Uasmhéid na bPointí | Nótaí Measúnaithe |
|---|---|---|
| Leibhéal comhair | 30 | Rannpháirtíocht scoileanna iolracha, IAOnna nó ionaid tacaíochta oideachais, nó ionad oideachais, mar shampla, suíomh Ógtheagmháil. Scóir níos airde do chomhar níos leithne nó trasearnála. |
| Tionchar ar fhoghlaim ghairmiúil | 30 | Cuspóirí atá sainmhínithe go soiléir a bhfuil tionchar suntasach agus intomhaiste acu ar fhoghlaim ghairmiúil ar fud na scoileanna, agus fianaise ar fhoghlaim chomhroinnte. |
| Ábharthacht do théamaí agus do bheartais | 15 | Ailíniú láidir le téamaí roghnaithe (Cleachtas Ionchuimsitheach, Múineadh na Gaeilge, Folláine, Ceannaireacht agus Caidreamh Gairmiúil) nó le beartas náisiúnta ainmnithe (e.g. ón gComhairle Múinteoireachta nó ón Roinn Oideachais). |
| Caighdeán an togra sócmhainne digití | 15 | Togra nuálach, cruthaitheach agus praiticiúil maidir le sócmhainn dhigiteach a chruthú lena dtaispeántar an ghníomhaíocht chun é a chur chun cinn ar bhonn níos leithne. |
| Miondealú buiséid réalaíoch | 10 | Miondealú buiséid atá trédhearcach, réalaíoch agus a bhfuil údar maith leis. |
9. Próiseas Measúnaithe
Déanfar iarratais a mheas mar seo a leanas:
| Tréimhse | |
|---|---|
| Scagadh | Déanfar gach iarratas a scagadh de réir na gcritéar incháilitheachta a leagtar amach i gCuid 5. |
| Scóráil | Déanfaidh painéal measúnaithe neamhspleách, arna cheapadh ag Stiúrthóir na Comhairle Múinteoireachta, na hiarratais incháilithe a scóráil. |
Dáileadh Maoinithe: Déanfar maoiniú a dháileadh chun a chinntiú go bhfuil maoiniú á thabhairt do scoil amháin i ngach cúige ar a laghad.
Aiseolas: Féadfaidh iarratasóirí aiseolas a iarraidh laistigh de thrí seachtaine ón am a gcuirfear an toradh in iúl dóibh.
10. Amlíne
| Dáta | Sceideal |
|---|---|
| Dé Céadaoin 16 Deireadh Fómhair | Iarratais ar oscailt |
| 6pm Déardaoin, 5 Nollaig | Cuirtear deireadh leis na hiarratais |
| Deireadh Eanáir 2025 | Cuirtear scoileanna ar an eolas faoi thorthaí |
| Go luath i mí Feabhra 2025 | Íoctar le scoileanna |
| 6pm Dé Máirt, 01 Iúil 2025 | Spriocdháta chun sócmhainní digiteacha, machnamh scríofa, suirbhé aiseolais agus forbhreathnú buiséid a chur isteach. |
11. Íocaíocht
Íocfar an sparánacht isteach i gcuntas bainc na scoile ceannais go luath i mí Feabhra 2025. Is ar an bpríomhscoil atá an fhreagracht an íocaíocht sparánachta a bhainistiú de réir an iarratais a cuireadh isteach, agus i measc na scoileanna comhoibríocha, de réir mar is cuí.
Beimid i dteagmháil go déanach i mí Eanáir 2025 chun íocaíocht a shocrú.
12. Próiseas achomharc
Más mian leat achomharc a dhéanamh in aghaidh an chinnidh, ní mór duit achomharc foirmiúil scríofa a chur faoi bhráid Stiúrthóir na Comhairle Múinteoireachta laistigh de 10 lá oibre ón toradh a fháil. Seol an t-achomharc chuig feilte@teachingcouncil.ie
Caithfidh an t-achomharc cur síos soiléir a dhéanamh ar na forais achomhairc, ar cheart dóibh a bheith bunaithe ar earráidí nóis imeachta nó ar neamhréireachtaí braite sa phróiseas measúnaithe.
| Próiseas Achomhairc | |
|---|---|
| Athbhreithniú ar Achomharc | Déanfaidh Painéal Achomhairc, ar a mbeidh measúnóirí nach raibh baint acu leis an bpróiseas cinnteoireachta bunaidh, athbhreithniú ar an achomharc. Ainmneoidh an Stiúrthóir an painéal. Déanfaidh an painéal measúnú ar leanadh an próiseas iarratais agus na critéir scórála i gceart agus go cothrom. |
| Toradh an Achomhairc | Beidh sé mar aidhm ag an bPainéal Achomhairc teacht ar chinneadh laistigh de 15 lá oibre ón achomharc a fháil. Cuirfear an cinneadh deiridh in iúl duit trí ríomhphost. Beidh an cinneadh sin críochnaitheach agus ceangailteach. |
| Gan eolas nua | Ní bhreithneofar achomhairc má tá siad bunaithe ar fhaisnéis nua nó ar athbhreithnithe ar an mbuniarratas. Ní féidir le hachomhairc ach dul i ngleic le cothroime nóis imeachta nó saincheisteanna measúnaithe. |
| Toradh achomharc | Má sheastar le d’achomharc, déanfar athmhachnamh ar d’iarratas. Má dhiúltaítear d’achomharc, seasfaidh an cinneadh bunaidh. |
13. Conas Iarratas a Dhéanamh
Tar éis duit na treoirlínte a léamh, cuir isteach d’fhoirm ar líne anseo:
Chun iarratas a dhéanamh, beidh na nithe seo a leanas ag teastáil uait:
- Sonraí do scoile
- Sonraí na scoileanna comhoibríocha go léir.
- Toiliú gach Príomhoide, Leas-Phríomhoide nó a choibhéis de na scoileanna go léir atá luaite san iarratas seo sula gcuirtear isteach é.
- Sonraí faoi na gníomhaíochtaí atá beartaithe (lena n-áirítear téamaí, aidhmeanna agus cuspóirí, tionchar etc.)
- Miondealú buiséid (lena n-áirítear míreanna buiséid, tuairisc ar mhíreanna buiséid, costas etc.)
- Sonraí maidir leis an tsócmhainn dhigiteach atá beartaithe agat a chruthú agus faoin méid a léireoidh sí faoi na gníomhaíochtaí foghlama gairmiúla agus a dtionchar
14. Ceisteanna maidir le hIarratas Sparánachta Féilte
Seo treoir maidir leis na ceisteanna a chuirfear ort agus tú ag cur isteach ar Sparánacht Féilte:
15. Cosaint Sonraí
Is í an Chomhairle Múinteoireachta an Rialaitheoir Sonraí. Úsáidtear na sonraí a bhailítear sa phróiseas iarratais e.g. ainmneacha agus sonraí teagmhála príomhoidí scoile nó a gcoibhéis chun na hiarratais ar sparánachtaí a riar. Úsáidtear sócmhainní digiteacha a chuirtear isteach mar chuid den scéim sparánachta chun an mhúinteoireacht a chur chun cinn mar ghairm.
Is é ár mbunús dlí maidir leis na sonraí sin a phróiseáil ná ár leas dlisteanach chun an mhúinteoireacht a chur chun cinn mar ghairm de réir ár n-oibleagáidí faoin Acht um Chomhairle Mhúinteoireachta 2001.
Mar atá sonraithe thuas, déanfar na sócmhainní digiteacha a roinnt ar shuíomh gréasáin na Comhairle Múinteoireachta agus ar chuntais meán sóisialta, agus déanfar iad a dháileadh ar gach múinteoir cláraithe chomh maith. Coinneofar sócmhainní digiteacha ar feadh 36 mí chun críoch athbhreithnithe éifeachtúlachta, agus scriosfar iad ansin ar bhealach slán.
Faoin Rialachán Ginearálta maidir le Cosaint Sonraí (RGCS) agus faoin Acht um Chosaint Sonraí, 2018 (DPA2018) tá roinnt cearta ag daoine aonair maidir lena sonraí pearsanta. Tá sé de cheart acu an méid seo a leanas a iarraidh orainn:
- rochtain ar a gcuid sonraí pearsanta
- a gcuid sonraí pearsanta a cheartú i gcás go bhfuil siad mícheart
- a gcuid sonraí pearsanta a scriosadh i gcúinsí áirithe,
- an ceart chun srian a chur ar phróiseáil nó agóid a dhéanamh i gcoinne próiseála in imthosca áirithe.
Is féidir leat teagmháil a dhéanamh lenár OCS ag dpo@teachingcouncil.ie.
Tá sé de cheart agat gearán a dhéanamh leis an gCoimisiún um Chosaint Sonraí má chreideann tú nár chomhlíonamar na ceanglais faoi RGCS nó DPA 18 maidir le do shonraí pearsanta.
16. Eolas Teagmhála
Má bhíonn aon cheisteanna agat nó má theastaíonn eolas breise uait, déan teagmháil le feilte@teachingcouncil.ie